තිලංග හා අර්ජුන විරසක වු වොල්වෝ ජාතකය දයාසිරි දිග හරියි..

තිලංග හා අර්ජුන විරසක වු වොල්වෝ ජාතකය දයාසිරි දිග හරියි..

මෙරට ක්‍රිකට් ක්‍රීඩාව විනාශ කළේ තමන් නොවන බවත් ඊට වගකිව යුතු වන්නේ රණතුංග පවුල බවත් හිටපු ක්‍රීඩා අමාත්‍ය දයාසිරි ජයසේකර මහතා ඊයේ (26) කොළඹ නිපෝන් හෝටලයේ පැවති මාධ්‍ය හමුවකදී පැවසීය.
තමන් කිසි විටෙකත් බුකීකරුවන් සමග එක්ව ගනුදෙනු කර නොමැති බවත් එහෙත් තමනට චෝදනා කරන අය මීට වසර ගණනාවකට පෙර බුකීකරුවන් සමග එක්ව කටයුතු කළ බව හෙතෙම පැවසීය.
“මම ක්‍රීඩා අමාත්‍යවරයා කාලේ විශාල කැපකිරීමක් කළා ක්‍රීඩාව නිවැරදි දිශානතියකට ගන්න. මම කරපු වැඩ ගැන කියවන්න මට වුවමනාවක් නැහැ. මගෙත් අඩුපාඩු තියෙන්න පුළුවන්. හැමකෙනෙක්ම 100%ක් නිවැරදි නැහැ. කෙසේ වෙතත් මට දිගින් දිගටම අර්ජුන රණතුංග මහතා කරන චෝදනා අහන් ඉන්න බෑ. වැරැද්දක් කරපු කෙනෙක්ට එම චෝදනා අහන ඉන්න පුළුවන්, එහෙත් වැරැද්දක් නොකර ඒවා අහන ඉන්න මම සූදානම් නැහැ.
මම බුකීකරුවන් සමග ඉන්නේ නැහැ. මම තිලංග සුමතිපාල මහතාව දන්නෙත් ඉතාම කෙටි කාලයයි. එහෙත් අර්ජුන රණතුංග මහතා තමයි තිලංග සුමතිපාල මහතාගේ ගෙවල්වල ගිහින් කාලා බීලා එකට හිටියේ. දැන් එතුමාට තිලංගව බුකීකාරයා, එදා එකට කාලා බීලා ඉද්දි බුකීකාරයා නෙමෙයිද දන්නේ නෑ”
එසේම අර්ජුන රණතුංග මහතා හා තිලංග සුමතිපාල මහතා විරසක වු හේතුව තීරු බදු රහිත වොල්වෝ රථයක් පිළිබඳ සිද්ධියක් බවද හෙතෙම පැවසීය.
අර්ජුන රණතුංග නායකත්වය දරන සමයේ තිලංග සුමතිපාලට ක්‍රිකට් පාලක මණ්ඩලයේ නිලවරණයට උදව් කළේ රණතුංග පවුලේ අයයි. 1998 තිබුණු ක්‍රිකට් පාලක මණ්ඩලයේ තිලංග සුමතිපාල සභාපති ඉද්දි ප්‍රධාන විධායක නිලධාරියා ධම්මික රණතුංග, උපසභාපති ප්‍රසන්න රණතුංග, විධායක සභික නිශාන්ත රණතුංග. මේ අය එකට හිටියේ. අර්ජුන මහතා තිලංගත් එක්ක තරහා වුණේ ඔහුගේ සොහොයුරා වන ධම්මික රණතුංගව ක්‍රිකට් පාලක මණ්ඩලයෙන් ඉවත් කළා කියලයි.
එකට හේතුව වුනෙත් තමන්ගේ මවට ලැබුණු තීරු බදු රහිත වොල්වෝ රථයක් ක්‍රිකට් පාලක මණ්ඩලයට ධම්මික විසින් විකුණා දැමීම හේතුවෙන්. ඒවගේම රූපවාහිනි විකාශන අයිතිය පිළිබඳව ගැටලුවකුත් තිබුණා. දැන් අපිට බුකී චෝදනා කරන අය ඒ කාලේ තිලංගත් එක්ක වැඩ කරද්දී මුකුත් කිව්වේ නැහැ”