විස්සයි විස්ස ලෝක කුසලාන ශ්රී ලංකාව සහ එංගලන්තය අතර තීරණාත්මක තරගයක් අද (26 දා) දිල්ලි හී පිහිටි ෆෙරෝසා කොට්ලා ක්රීඩාංගණයේදී පැවැත්වේ.
තරගය ශ්රී ලංකා වේලාවෙන් ප.ව. 7.30 ට ආරම්භ වීමට නියමිතය.
ඊයේ (25) මාධ්ය හමුවට පැමිණි ශ්රී ලංකා උපනායක දිනේෂ් චන්දිමාල් පැවසුවේ එංගලන්තය පුදුම කරවන වෙනස්කම් සහිතව ඔවුන්ව පරාජය කිරීමට තම කණ්ඩායම සැලසුම් සකස් කර ඇති බවයි.
”අපි මේ තරගයට එන්නේ දින හයක විතර හොඳ විවේකයක් අරගෙන. ඒ කාලයේදී අපි වැඩිය පුහුණුවීම්වලට වඩා අවධානය යොමු කළේ කරපු වැරදි ගැන කතා කරල ඒ මොනවද කියල වීඩියෝ මගින් නිරීක්ෂණය කරපු එක. අපි එතනදී දැන ගත්තා පසුගිය කාලයේ අපෙන් මොනවද වුන අඩුපාඩු කියලා.” යනුවෙන් චන්දිමාල් පැවසීය.
ශ්රී ලංකා කණ්ඩායම අලුතින් පරිවර්තනය වෙමින් තිබෙන යුගයක මැද පෙළ පිතිකරු බල ඇණිය ශක්තිමත් නොවීම පිළිබඳව වැඩි අවධානයක් යොමු කළ බවත් මේ තරගයේදී ඒ වෙනුවෙන් ක්රීඩකයන් සියලු දෙනා වගකීම භාර ගත යුතු බවත් චන්දිමාල් පවසයි.
“අපේ ගොඩක් නවක ක්රීඩකයන් ඉන්නවා. මැද පෙළ පසුගිය තරගවලදී හරියට ලකුණු අතරට ආවෙ නැහැ. ක්රීඩකයන් හැටියට අපි ඒ සියලු දේවල් පසුගිය දින කිහිපයේදී හොඳින් අධ්යයනය කරල සැලසුමක් ඇතිව තමයි එංගලන්තය සමඟ තරගවදින්නෙ. මේ තරගයේදී අපේ ගොඩක් වෙනස්කම් තියෙනවා. සමහර විට එංගලන්තය හිතන්නෙත් නැති වෙනස්කම් අපි ළඟ තියෙනවා.”
විස්සයි විස්ස තරගවලදී කොතරම් ලකුණු ප්රමාණයක් ලබා ගත්තද එය හඹා යැමට ඕනෑම කණ්ඩායමකට හැකි බැවින් තම කණ්ඩායමේ සිටින ප්රධානතම පන්දු යවන්නා වන රංගන හේරත් එංගලන්ත පිල මට්ටු කර දමනු ඇතැයි ශ්රී ලංකා උපනායකයා විශ්වාසය පළ කරයි.
‘‘රංගන හේරත් අද ලෝකයේ ඉන්න විශිෂ්ටතම දඟ පන්දු යවන්නෙක්. ඔහු දන්නවා ඕනෑම පීඩනයක් හසුරුවමින් පන්දු යවන්න. අපිට ඉන්නවා තව සචිත්ර සේනානායක සහ ජෙෆ්රි වැන්ඩ්රසිත්. එංගලන්ත පිල ප්රබල කණ්ඩායමක් බව අපි ඔලුවෙ තියාගෙන තමයි තරගයට එන්නෙ. ඔවුන්ගේ එක ක්රීඩකයෙක් දෙන්නෙක් කියල කියන්න බැහැ කණ්ඩායම ගත්තහම හොඳම ක්රීඩකයන් ඉන්නෙ. අපි මේ තරගය වගේම දකුණු අප්රිකානු තරගය ගැනත් පසුගිය දින කිහිපයේදී සැලසුම් සකස් කළා. පළමුවෙන්ම එංගලන්ත පිල පරාජය කරන්න අපි කණ්ඩායමක් හැටියට හැම දෙනාම අත උස්සල වගකීම භාර ගන්න ඕන.” යෑයි චන්දිමාල් වැඩිදුරටත් පැවසීය.
පන්දු රැකීමේදී දැක්වූ දුර්වලතාව මග හරවා ගැනීමට ඊයේ ශ්රී ලංකා නායකයා පිටිය මැද උඩ පන්දු රැක ගැනීමේ පුහුණුවක නිරත වූ අතර තිලකරත්න ඩිල්ෂාන්ද වෙනදා මෙන් උද්යෝගයෙන් පන්දු
රැකීමේ පුහුණුවීම්වල නිරත විය.
ඊයේ දිනයේදී ඩිල්ෂාන්, චන්දිමාල්, තිරිමාන්න, මැතිව්ස්, කපුගෙදර, ෂෙහාන් ජයසූරිය සහ තිසර පෙරේරා පුහුණු දැල තුළ වැඩි වේලාවක් පන්දුවට පහර දෙනු දක්නට ලැබුණි. නුවන් කුලසේකරට අද තරගයේදී බොහෝ දුරට බංකුවේ සිටීමට සිදුවීමට වැඩි අවස්ථාවක් ඇත්තේ දඟ පන්දු යවන්නන්ගෙන් එංගලන්ත පිතිකරුවන් මට්ටු කිරීමට ශ්රී ලංකා නායකයා සහ උපනායකයා අදහස් කර සිටින බැවිනි.
“දඟ පන්දු යවන්නන්ට හොඳ තත්ත්වයක තණතීරු හැසිරෙනවා. ඒ නිසා සචිත්රටත් අවස්ථාවක් තියෙයි. නමුත් තරගයට සකස් කරල තියෙන තණතීරුව බලල තමයි අපි අවසන් කණ්ඩායම නම් කරන්නෙ.” යෑයි චන්දිමාල් පවසයි. තිලකරත්න ඩිල්ෂාන්ට නම් අද තරගය පැවැත්වෙන ෆෙරෝසා ක්රීඩාංගණය හුරු පුරුදු වී ඇත්තේ ඔහු අයි.පී.එල්. ක්රීඩා කරද්දී මෙම දිල්ලි ඩෙයා ඩෙවිල්ස් පිල වෙනුවෙන් මෙහිදී ඇති තරම් පුහුණුවීම්වල නිරතව තරගවලට සහභාවී සිටීම නිසාය.
එංගලන්තය සහ ශ්රී ලංකාව අතර මෙතෙක් පවත්වා ඇති විස්සයි විස්ස තරග හයෙන් සිව්වතාවක්ම ශ්රී ලංකාව ජය ගනිද්දී එංගලන්තයට ජය ගැනීමට හැකි වූයේ තරග දෙකක් පමණි. ඉතිහාසයේ වාර්තා කෙසේ වුවද එංගලන්ත පිල පළමු වටයේ සහභාගි වන අවසන් තරගය මෙය වන බැවින් ඔවුන් ශ්රී ලංකාව පරාජය කළහොත් නියත වශයෙන්ම අවසන් පූර්ව තරග අවස්ථාව හිමිකර ගනු ලබයි.
ශ්රී ලංකාව ජය ගතහොත් සෙසු කණ්ඩායම් වල ජය පරාජය අනූව පළමු කාණ්ඩයෙන් දළ ලකුණු වේගය මත අවසන් පූර්ව තරගයේ අවස්ථාවක් ලැබේද යන්න බලා සිටීමට එංගලන්ත පිලට සිදුවනු ඇත.
